د پوهنتون اداري کارکوونکو ته د عقودو قانون په هکله د پوهاوي درې ورځنی سېمينار پای ته ورسېد
دغه سېمينار چې د لوړو زدهکړو وزارت په لارښوونه د ياد پوهنتون د مالي او اداري چارو معاونيت په نوښت داير شوی ؤ؛ د پوهنتون رهبرۍ او اداري کارکوونکو په کې برخه اخيستې وه.
د عقودو قانون چې د مشرتابه عالي مقام په(۳۶) گڼه فرمان سره توشېح شوی، د پوهاوي او تشرېح سېمينار په لړ کې يې د سيد جمال الدين افغاني پوهنتون رييس شيخ عبدالمالک محسن له لوري د درې ورځو پر دوام د ياد قانون ټولې مادې وار په وار تشرېح شوې او د گډونوالو پوښتنې يې هم ځواب کړې. نوموړي په خپلو بيانونو کې لارښوونه وکړه چې ټول بايد د مشرتابه عالي مقام فرمانونه او حکمونه په بشپړ ډول په خپلو ورځنيو چارو کې پر ځان عملي کړي. دغه سېمینار چې درې ورځې وړاندې پیل شوی ؤ، نن ورځ د ياد پوهنتون د مالي او اداري چارو مرستيال حافظ مولوي محمدعثمان سعيد په دُعايه کلماتو سره پای ته ورسېد.
د يادونې ده چې د سېمينار برخهوالو د ياد سېمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
