پوهنتون کې د نیالگیو کښېنولو کمپاین پیل شو

یاد کمپاین چې سيد جمال الدين افغاني پوهنتون د مالي او اداري چارو معاونيت تر چتر لاندې د چاپېریال ساتنې عمومي کمېټې او خدماتو آمريت په گډو هڅو د نږدې(۶۰۰) نيالگيو په کښېنولو سره پیل شو، چې نن ورځ یې د پوهنتون ريیس، مرستیالانو، پوهنځيو رييسانو او نورو مسؤلینو له لوري پرانیسته وشوه.

کمپاین د پرانیستې پر مهال د پوهنتون رييس شيخ عبدالمالک محسن د نیالگیو کښېنولو په ارزښت او اهمیت خبرې وکړې او هغه یې دوامداره صدقه وبلله او زياته يې کړه، چې د چاپېریال ښکلا، سمسورتیا او خوندیتوب د ټولو شريک مسؤلیت دی نو د دې لپاره بايد نیالگي کښېنوو او دوامداره ساتنه او پالنه يې وکړو. نوموړي همدارنگه د چاپېریال ساتنې عمومي کمېټې له غړو، خدماتو آمريت مسؤلینو او په کمپاین کې يې له بوختو کارگرانو او محصلينو څخه مننه وکړه، چې پوهنتون د ښېرازۍ لپاره هلې ځلې کوي. ورپسې د نیالگیو کرلو کمپاین پرانیسته وشوه او د پوهنتون مشرتابه غړو او نورو مسؤلینو په ټاکل شویو ځایونو کې نیالگي نهال کړل.