پوهنتون د رييس په مشرۍ د ستراتيژيک پلان جوړونې بورډ ناسته وشوه
سيدجمال الدين افغاني پوهنتون د رييس پوهنمل محب الله محب په مشرۍ؛ پوهنتون د ستراتيژيک پلان جوړونې بورډ ناسته وکړه.
په ياده کاري ناسته کې د علمي چارو مرستيال پوهندوی ميرويس ستانکزي او د پوهنتون ستراتيژيک پلان جوړونې بورډ غړو ګډون درلود چې په کې د مخکني ستراتیژیک پلان د پياوړو او کمزورو ټکو ارزونه، د پوښتنپاڼو او چک لېستونو ترتيب، د ستراتیژیک پلان جوړولو د مراحلو او کړنلارې ټاکل، مهالوېش او د نورو بېلا بېلو موضوعاتو په اړه بحث او پرېکړې وشوې.
پيل کې د پوهنتون رييس پوهنمل محب الله محب د ښه راغلاست ترڅنګ، د ستراتيژيک پلان د ترتيب پر پړاوونو خبرې وکړې او د پلان په جوړونه کې يې د پلي کېدو وړ شاخصونو د ټاکلو او د نورو موضوعاتو په اړه د بورډ غړو ته لازمې سپارښتنې او لارښوونې وکړې.
ورپسې د علمي چارو مرستيال پوهندوی ميرويس ستانکزي په خپلو خبرو کې د راتلونکو پنځه کالونو لپاره د ستراتیژیک پلان په ترتيب کې، د ټولنې او اړوندو سکتورونو غوښتنو په پام کې نيولو او د کارونو پر دقت او سرعت ټيګار وکړ.
غونډه د خير په دُعا سره پای ته ورسېده.
