د پوهنتون عمومي رئيس د پنځهگونو پوهنځيو له تدریسي بهیر څخه لیدنه او څارنه وکړه
د سيد جمال الدين افغاني پوهنتون عمومي رئيس الحاج مولوي عبدالواسع منصور د علمي چارو مرستیال قاضي عبدالهادي فضلي او د نورو مسؤلينو په ملتيا د پنځهگونو پوهنځيو له تدریسي چارو څخه ليدنه وکړه چې د لیدنې پر مهال يې د پوهنځيو روان تدریسي بهیر وارزاوه او د استادانو او محصلینو حاضرۍ يې هم کنټرول کړې.
د پوهنتون عمومي رئيس د تدريسي بهير د لاښهوالي او محصلينو د حاضرۍ دوامدارې څارنې په برخه کې د پوهنځيو مسؤلینو او استادانو ته لازمې سپارښتنې او جدي لارښوونې وکړې. نوموړي محصلينو ته په خطاب کې وويل چې تاسو د دې ملت راتلونکی ياست نو په خپلو درسونو کې تر پخوا څو برابره زيات کوشش وکړئ، د رڼا دا لاره په پوره همت سره تعقيب کړئ او په دې برخه کې نظام په پوره معنا ستاسو ملاتړ کوي. محصلينو په خپلو خبرو کې د پوهنتون رهبرۍ ته ډاډ ورکړ چې د علم د حصول په دې لار کې به هېڅ ډول تهديد ته تسليم نه شي او د دښمن ټولې دسيسې به شنډې کړي.
