کمپيوټرساينس پوهنځي په اسيا کې د نړۍوالو ټولنيزو خدمتونو له مؤسسې سره د گډو همکاریو هوکړه لاسلیک کړه
سيد جمال الدين افغاني پوهنتون د کمپيوټرساينس پوهنځي په اسيا کې د نړۍوالو ټولنيزو خدمتونو له مؤسسې سره د گډو همکاریو هوکړه په داسې حال کې لاسلیک کړه چې د پوهنتون رييس شيخ عبدالمالک محسن او مرستيالانو يې حضور درلود.
د دواړو ادارو ترمنځ د علمي او ظرفیت لوړونې په موخه د دوه اړخيزو همکاريو هوکړهلیک د کمپيوټرساينس پوهنځي رييس پوهنيار ذاکرالله عزام او په اسيا کې د نړۍوالو ټولنيزو خدمتونو د مؤسسې سرپرست حزب الرحمن له لوري لاسلیک شو، چې په مراسمو کې يې د پوهنتون مشرتابه سربېره د ياد پوهنځي استادانو او د نوموړې مؤسسې مسؤلينو هم برخه لرله.
د يادونې ده چې د دې دوه اړخیزې هوکړې له مخې به د علمي او مسلکي همکاريو ترڅنگ، د پوهنتون استادانو او محصلینو ته د اړینو تجربو د ترلاسه کولو په برخه کې لازمې اسانتياوې برابرې شي او همداراز به ياده مؤسسه د پوهنځي لپاره د علمي زدهکړو کار ځای هم جوړوي.
