د یوې غونډې په ترڅ کې غوره څېړونکي استادان او محصلين وستايل
سيد جمال الدين افغاني پوهنتون د علمي څېړنو او مجلې معاونیت له لوري د پنځهگونو پوهنځيو هغه استادان چې په ملي او نړيوالو ژورنالونو او کنفرانسونو کې یې ډېرې علمي مقالې خپرې او وړاندې کړې وې او همدا راز د ۱۴۰۳ هـ . ش کال هغه فارغ التحصيل محصلان چې مونوگرافونو يې د پوهنتون په کچه غوره مقام خپل کړی ؤ، د يوې غونډې په ترڅ کې وستايل شول.
په همدې مناسبت جوړې شوې ستاينغونډه کې د پوهنتون رييس شیخ عبدالمالک محسن، د علمي څېړنو او مجلې مرستيال پوهندوی دوکتور سيد اصغر هاشمي، د پوهنځيو رييسانو، استادانو او محصلينو گډون کړی ؤ.
غونډې ته د پوهنتون ريیس د علم پر ارزښت او د څېړنې پر اهميت هر اړخيزې خبرې وکړې او د هېواد پرمختگ يې په پوهې او څېړنې پورې تړلی وباله. نوموړي په ياده برخه کې د استادانو او محصلينو هاند وستايه او د لا نورو هڅو غوښتنه يې ترې وکړه.
د علمي څېړنو او مجلې مرستيال د ياد پوهنتون په کچه د استادانو له لوري د ترسره شويو څېړنو او علمي مقالو احصايه وړاندې کړه او همدا راز يې د ياد معاونيت له لاسته راوړونو، پرمختگونو او راتلونکو پلانونو لنډه يادونه وکړه. د ستایل شویو استادانو په استازيتوب د شرعياتو پوهنځي استاد پوهندوی عطاءالله عصامي د پوهنتون مشرتابه له ملاتړ او هڅونې څخه د مننې تر څنگ په راتلونکي کې د لا غوره څېړنيزو فعاليتونو د ترسراوي ژمنه وکړه. غونډه غوره څېړونکو استادانو او محصلينو ته د ستاینلیکونو په ورکړې او دُعايه کلماتو سره پای ته ورسېده.
