د پوهنتون عمومي رئيس د ښوونې او روزنې پوهنځي له مسؤلينو او استادانو سره ناسته وکړه
د سيد جمال الدين افغاني پوهنتون عمومي رئيس الحاج مولوي عبدالواسع منصور، د څېړنو او علمي مجلو مرستيال پوهندوی دوکتور سيد اصغر هاشمي په گډون د ښوونې او روزنې پوهنځي له مسؤلينو او استادانو سره ناسته وکړه. په دغه ناسته کې د پوهنتون عمومي رئيس د استادانو له څېړنيزو خدمتونو او فعاليتونو څخه مننه وکړه چې له کبله يې پوهنتون په ملي کنفرانسونو کې لوړ مقامونه خپل کړي دي او زياته يې کړه چې دا د دوی خپلې دندې ته تعهد او ژمنتيا ښيي. نوموړي استادانو ته لارښوونه وکړه چې د ولس بچيانو د روزنې په برخه کې ورسپارل شوی مسؤليت په صحيح نيت او اخلاص سره اداء کړي او خپل کارونه په مشوره او همکارۍ سره مخکې يوسي. ورپسې د ياد پوهنځي رئيس پوهنيار مولوي خانزاده حنيفي د پوهنځي د پرمختگونو، لاسته راوړنو، شته ستونزو او راتلونکو پلانونو په هکله معلومات وړاندې کړل، چې د پوهنتون عمومي رئيس د ياد پوهنځي په لاسته راوړنو خوښي وښوده او د ستونزو د حل ډاډ يې ورکړ. ياده ناسته چې د قرانکريم د څو مبارکو اياتونو پر تلاوت پیل شوې وه، په دُعايه کلماتو سره پای ته ورسېده.
