د پوهنتون رييس کونړ ولايت کې د تنوير لوړو زدهکړو خصوصي مؤسسې له چارو څارنه او ارزونه وکړه
د سيد جمال الدين افغاني پوهنتون رييس شيخ عبدالمالک محسن چې د محصلانو چارو مرستیال پوهنمل علي احمد بهار يې ملتيا کوله د ياد تحصيلي بنسټ د علمي، محصلانو، تدریسي او اداري چارو د ارزونې ترڅنگ؛ د نوموړې مؤسسې مشرتابه پلاوي، استادانو او محصلینو ستونزې واورېدې او هغوی ته يې د حل ډاډ ورکړ.
شيخ عبدالمالک محسن د هېواد په پرمختگ کې د علمي بنسټونه رول مهم وباله او د تنوير لوړو زدهکړو خصوصي مؤسسې مشرتابه ته يې ډاډ ورکړ چې د سيد جمال الدين افغاني پوهنتون له دوی سره د ظرفيت لوړونې په برخه کې همکارۍ ته چمتو دی. نوموړي د يادې مؤسسې مسؤلينو ته لارښوونه وکړه چې د محصلينو په سالمه فکري روزنه کې خپل مسؤليت ته پوره متوجه شي.
د محصلانو چارو مرستیال پوهنمل علي احمد بهار د تدريسي بهير د لا ښهوالي، د نصاب او کورس پاليسۍ بشپړ تطبيق او د محصلينو حاضرۍ په برخه کې د يادې خصوصي مؤسسې مسؤلينو ته لازمې سپارښتنې وکړې.
د تنوير لوړو زدهکړو خصوصي مؤسسې رييس مولوي سراج الاسلام په خپلو خبرو کې د سيد جمال الدين افغاني پوهنتون د رهبري پلاوي په ورتگ خوښي وښوده او د يادې خصوصي مؤسسې پر فعاليتونو يې رڼا واچوله.
ياده دې وي چې د سيد جمال الدين افغاني پوهنتون رهبري په کونړ ولايت کې د تنوير لوړو زدهکړو له خصوصي مؤسسې څخه په دوامداره توگه ليدنې او له فعاليتونو يې څارنه کوي.
