د شرعياتو پوهنځي محصلينو ته د عملي زده کړو په موخه تمثيلي محکمه جوړه شوه
سيد جمال الدين افغاني پوهنتون د شرعياتو پوهنځي محصلينو له لوري د استادانو تر لارښوونې لاندې د ځمکې غصب قضيې اړوند بهير په تمثيلي بڼه وښودل شو چې په مراسمو کې يې د پوهنتون مشرتابه، د کونړ ولايت اړوند ادارو استازو، د پوهنځيو رييسانو، د پوهنتون استادانو او محصلينو برخه لرله.
د پوهنتون ريیس شيخ عبدالمالک محسن په خپلو خبرو کې د محصلينو د عملي زده کړو په برخه کې دا يو گټور گام وباله او له تنظيموونکو يې مننه وکړه. نوموړي وويل دا چې په محاکمو کې کار کول د علم تر څنگ تجربې ته هم پوره اړتيا لري نو محصلينو ته د ظرفيت لوړونې په موخه د داسې تمثیلي برنامو دايرول ډېر مهم دي.
ورپسې د کونړ ولايت امنیه قومندانۍ استازي مولوي محمدسليم مخلص تر خبرو وروسته د شرعياتو پوهنځي محصلينو له لوري تمثيلي محاکمه په ښه شان سره وړاندې شوه، چې د گډونوالو له لوري د ځانگړې پاملرنې وړ وگرځېده.
په پای کې د کونړ ولايت محاکمو رياست اړوند د شهري محکمې رييس مولوي رحمت الله په خپله ارزوونکې وينا کې د استادانو او محصلينو هڅې وستايلې او ياده تمثيلي محکمه يې مثبته وارزوله.
