د محصل ژمنليک د لا ښه تطبيق په موخه له استادانو سره مشورتي ناسته وشوه
د لوړو زده کړو وزارت له لوري را لېږل شوي د(محصل ژمنليک) د لا ښه تطبيق په موخه د پوهنتون رهبرۍ د اسلامي ثقافت او د ټولگيو له لارښود استادانو سره مشورتي ناسته وکړه.
د سید جمال الدین افغاني پوهنتون عمومي رئيس الحاج مولوي عبدالواسع منصور، د علمي چارو مرستيال قاضي عبدالهادي فضلي په شتون کې د اسلامي ثقافت او د ټولگيو له لارښود استادانو سره د محصل ژمنليک د لا ښه تطبيق په موخه مشورتي ناسته وکړه.
د پوهنتون عمومي رئيس يادو استادانو ته سپارښتنه وکړه چې په خپلو منځ کې ښه همغږي ولري او يو له بل سره خپلې تجربې او نېکې مشورې شريکې کړي. نوموړي په خپله وينا کې د استادانو مسؤليت په اشارې وويل، چې ستاسو مسؤليت ډېر دروند دی نو په حکمت او احسنه طريقې سره يې اداء کړئ او همداراز د محصلينو سالمې فکري او اصلاحي روزنې ته پوره متوجه شئ.
د علمي چارو مرستيال قاضي عبدالهادي فضلي په خپلو خبرو کې د ټولگيو لارښود استادانو ته سپارښتنه وکړه چې د محصل ژمنليک د لا ښه پلي کېدو په موخه له صنفونو دوامداره څارنه وکړي او محصلين دې د ژمنليک تطبيق ته پوره متوجه کړي. نوموړي د اسلامي ثقافت استادانو ته لارښوونه وکړه چې د ياد ژمنليک د لا ښه پوهاوي په هکله د محصلانو چارو معاونيت سره په همغږۍ محصلينو ته سېمينار داير کړي. دغه ناسته چې د قرانکريم د څو مبارکو اياتونو په تلاوت سره پیل شوې وه، د شرعياتو پوهنځي رئيس مولوي کليم الله حقاني له لوري په دُعايه کلماتو سره پای ته ورسېده.
