د پوهنتون عمومي رئيس د اقتصاد پوهنځي له مسؤلينو او استادانو سره ناسته وکړه
د سيد جمال الدين افغاني پوهنتون عمومي رئيس الحاج مولوي عبدالواسع منصور د اقتصاد پوهنځي له مسؤلينو او استادانو سره په ناسته کې په اقتصادي برخه کې له اسلامي لارښوونو سره سم د پاليسيو پر ايجاد او په دې تړاو د نويو څېړنو د ترسره کولو پر اهميت او ارزښت هر اړخيزې خبرې وکړې او د پوهنځي استادانو ته يې لارښوونه وکړه چې په ياده برخه کې نوې څېړنې وکړي. ورپسې د ياد پوهنځي رئيس پوهنيار حامد احمد مراد د پوهنځي د پرمختگونو، لاسته راوړنو، شته ستونزو او راتلونکو پلانونو په هکله معلومات وړاندې کړل. د پوهنتون عمومي رئيس د ياد پوهنځي په لاسته راوړنو خوښي وښوده او د ستونزو د حل ډاډ يې ورکړ. ياده ناسته چې د قرانکريم د څو مبارکو اياتونو پر تلاوت پیل شوې وه، په دُعايه کلماتو سره پای ته ورسېده.
