پوهنتون کې د کونړ ولايت پوهنې رياست د مسلکي پراختيا غړو ته د کانکور ازموينې په اړه د عامه پوهاوي درې ورځنی روزنيز سېمينار پای ته ورسېد
دغه روزنيز سېمينار چې د لوړو زده کړو وزارت په لارښوونه د پوهنځيو د څانگو په ټاکنه کې د کانکور گډونوالو د ستونزو د حل په موخه جوړ شوی ؤ، چې د کونړ ولايت د مرکز په گډون د ټولو ولسواليو څخه د پوهنې رياست اړوند د مسلکي پراختيا نږدې(۵۰) غړو په کې برخه اخيستې وه.
د دغه سېمينار په پيل کې د سيد جمال الدين افغاني پوهنتون رييس شيخ عبدالمالک محسن د سېمینار د دايرېدو پر هدف، اهميت او ارزښت خبرې وکړې او د هېواد د بچيانو سالمه او باکيفيته روزنه يې د لوړو زده کړو او د پوهنې وزارتونو مشترک مسؤليت وباله. نوموړي په خپلو خبرو کې د زده کوونکو په فکري او اصلاحي روزنه ټينگار وکړ او له گډونوالو يې وغوښتل چې له دې سېمينار څخه د زده کوونکو د پوهاوي په برخه کې اعظمي استفاده وکړي چې په راتلونکي کانکور ازموينه کې د گډونوالو تيروتنې راکمې شي.
د ياد درې ورځني سېمينار پر مهال د پوهنتون استادانو په خپلو پرېزنټېشنونو کې د هېواد تحصيلي نظام د ټولو رشتو پېژندنې، ارزښت، په ټولنه کې اړتيا، د انتخاب شرايطو، په ملي او نړيواله کچه د کار ساحې، فرصتونو او ننگونو په تړاو معلومات وړاندې کړل او د گډونوالو پوښتنې يې هم ځواب کړې.
د دې سېمینار د پای په مراسمو کې د پوهنتون علمي چارو مرستيال قاضي عبدالهادي فضلي په خپله ارزوونکې وينا کې د پوهنتون له استادانو، د سېمینار برخهوالو او تنظيموونکو څخه د مننې ترڅنگ د سېمینار پر ارزښت او اړتیا خبرې وکړې او گډونوالو ته يې سپارښتنه وکړه چې له تدريس شويو موضوعاتو څخه د زده کوونکو په پوهاوي پوره گټه واخلي. دغه سېمینار چې درې ورځې وړاندې پیل شوی ؤ نن ورځ د شرعياتو پوهنځي د رييس سراج الدين عمر منصور په دُعايه کليماتو سره پای ته ورسېد.
د يادونې ده چې د سېمينار برخهوالو د ياد سېمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
