پوهنتون کې د امام ابوحنيفه رحمه الله د مناقبو په تړاو يو ورځنی علمي سېمينار داير شو
پوهنتون سيد جمال الدين افغاني پوهنتون کې د محصلانو چارو معاونيت په نوښت د امام ابوحنيفه رحمه الله د مناقبو په تړاو يو ورځنی علمي سېمينار داير شو چې په کې د پوهنتون مشرتابه، د پوهنځيو رييسانو، استادانو، اداري کارمندانو او محصلينو برخه لرله.
پيل کې د قرآن کريم د مبارکو آیاتونو تر تلاوت وروسته د پوهنتون رييس شيخ عبدالمالک محسن گډونوالو ته د ښه راغلاست ترڅنگ وویل:”امام ابوحنيفه رحمه الله د علم او معرفت په ميدان کې د کمال مقام ته رسېدلی او نهايت ځيرک، هوښيار او عاقل انسان ؤ، چې په مسلک او مذهب کې يې ډېر زيات احتياط او ادب دی. " نوموړي په خپلو خبرو کې د ياد سېمينار له تنظيموونکو مننه وکړه او زياته يې کړه چې د داسې علمي سېمينارونو لړۍ به جاري وساتي.
ورپسې شيوخو کرامو هر يو: کونړ ولایت د علماوو شورا رييس شيخ عبدالقهار صديقي او ياد پوهنتون د شرعياتو پوهنځي رييس مولوي عبدالمنان البدر په خپلو ويناوو کې د امام ابوحنيفه رحمه الله د پېژندنې او تعارف، نسب او ژوندانه، علم او معرفت، اخلاص او تقوا، صبر او استقامت، امانت او صداقت، تواضع او عاجزۍ، تدريس او شاگردانو او همداراز د وفات په اړه عالمانه تفصيلي ويناوې وکړې او زياته يې کړه چې امام ابوحنيفه رحمه الله د فقاهت او اجتهاد تر څنگ يو لوى محدث عالم هم ؤ.
په پای کې د شيوخو کرامو له لوري د گډونوالو پوښنتونو تر ځوابولو وروسته ياد علمي سېمينار په دُعايه کلماتو سره پای ته ورسېد.
هېره دې نه وي چې په ياد پوهنتون کې تر دې وړاندې هم دې ته ورته علمي سېمينارونه او کنفرانسونه داير شوي او په راتلونکي کې به هم دا لړۍ دوام ولري.
