پوهنتون محصلينو ته د مونوگراف ليکنې تر سرليک لاندې يو ورځنی روزنیز سېمینار داير شو
دغه روزنیز سېمینار چې سيد جمال الدين افغاني پوهنتون د مسلکي پرمختيا آمريت له لوري د محصلانو چارو او د علمي څېړنو او مجلې معاونيتونو په همغږۍ جوړ شوی ؤ، د پنځهگونو پوهنځيو د اتم سمستر لسگونو محصلينو په کې برخه لري.
پيل کې د پوهنتون مسلکي پرمختيا آمر پوهنيار امان الله توتاخېل د مونوگراف ليکنې پر اړتيا، ارزښت او اهميت په اړه خبرې وکړې او همداراز يې د ياد آمريت له فعاليتونو، پلانونو او لاسته راوړنو يادونه وکړه.
ياد روزنیز سېمینار د پوهنتون علمي څېړنو او مجلې مرستيال پوهندوی دوکتور سيد اصغر هاشمي له لوري د مونوگراف لیکنې د نوي لارښود په رڼا کې وړاندې شو او د لارښود ټول موضوعات يې وار په وار تشريح کړل او همداراز يې د گډونوالو پوښتنې هم ځواب کړې.
د يادونې ده چې گډونوالو د دې ډول سېمينارونو پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
