پوهنتون د ماسټر پلان د تدوين کمېټې ناسته وکړه
سيد جمال الدين افغاني پوهنتون د ماسټر پلان د تدوين کمېټې په علمي څېړنو او مجلې معاونيت کې د ماسټر پلان د ترتيب او تدوين په تړاو ناسته وکړه چې په کې د پوهنتون علمي چارو مرستيال قاضي عبدالهادي فضلي، د علمي څېړنو او مجلې مرستيال پوهندوی دوکتور سيداصغر هاشمي، د مالي او اداري چارو مرستيال قاري رحمن الله صادق، د کمپيوټرساينس پوهنځي رييس پوهنيار ذاکرالله عزام، د اقتصاد پوهنځي مرستيال پوهنيار مجيب الله ايوبي او د پلان او احصايې عمومي مدير سيد اکرام پاچا برخه لرله.
پیل کې د علمي څېړنو او مجلې مرستيال د ماسټر پلان د اهميت په تړاو خبرې وکړې او زياته يې کړه چې ماسټر پلان د پوهنتونونو لپاره ځکه مهم دی، ترڅو راتلونکي نسلونه په اسانۍ سره وکولای شي په ډاډمنه توگه د اسانتياو په شتون خپلې زده کړې وکړي.
ورپسې د پوهنتون علمي چارو مرستيال د ماسټر پلان د تدوين او تطبيق لپاره له اړوندو ادارو سره همغږي اړينه وبلله او زياته يې کړه چې لومړی بايد د پوهنتون ټولې اړتياوې تشخيص او پلي کېدو ته يې ځمکه ځانگړې شي.
د اقتصاد پوهنځي مرستيال په خپل وار د پوهنتون ماسټر پلان د تدوين په پار ترتيب شوې خاکه د کمېټې غړو ته وړاندې کړه او زياته يې کړه چې د پوهنتون اړتياوو ته په پام به دا طرحه په راتلونکي کې په تشريحي بڼه ترتيب شي.
پر نورو بېلابېلو موضوعاتو تر بحث وروسته ناسته د خیر په دُعا سره پای ته ورسېده.
