پوهنتون د علمي شورا نوبتي ناسته وشوه
ياده ناسته چې د سيد جمال الدين افغاني پوهنتون رييس شيخ عبدالمالک محسن په مشرۍ وشوه، په کې د علمي چارو مرستيال قاضي عبدالهادي فضلي، د محصلانو چارو مرستيال پوهنمل علي احمد بهار، د علمي څېړنو او مجلې مرستيال پوهندوی دوکتور سيد اصغر هاشمي، د مالي او اداري چارو مرستيال حافظ مولوي محمدعثمان سعيد، د پوهنځيو ريیسانو او استادانو برخه لرله.
پوهنتون رييس د پرانیستې وینا پر مهال د شورا پر ارزښت او اهميت هر اړخيزې خبرې وکړې او اړوند مسؤلين يې خپلو دندو ته ځیر کړل. ورپسې د پوهنتون مرستيالانو د تېرې مياشتې کاري راپورونه له شورا سره شريک کړل او همداراز د تېرې علمي شورا د پرېکړو گزارش وړاندې شو.
په دغه کاري ناسته کې د نړۍوال علمي ژورنال پر جوړولو، کرنې پوهنځي د اگرانومي او ښوونې او روزنې پوهنځي د پښتو ادب په ديپارتمنتونو کې د ماسټرۍ برنامو پر ايجاد، پوسټر پرېزنټېشن ته په چمتووالي، مسلکي پرمختيايي مرکز د مشورتي بورد په ټاکلو، بېلابېلو کمېټو پر تعين او د يو شمېر نورو موضوعاتو په اړه يې بحث او پرېکړې وکړې. ياده ناسته د خیر په دُعا پای ته ورسېده.
