د ۱۴۰۴ کال د کانکور ازموینې گډونوالو د بایومتریک معلوماتو د ثبت پروسه پيل او په چټکۍ سره روانه ده
د سيد جمال الدين افغاني پوهنتون رييس شيخ عبدالمالک محسن، د محصلانو چارو مرستیال پوهنمل علي احمد بهار او د مالي او اداري چارو مرستيال حافظ مولوي محمدعثمان سعيد؛ د ازموينو ملي ادارې څخه د راغلي پلاوي مشر او د يادې ادارې د دفتر رييس استاد احمدنويد نوري په ملتيا د بایومتریک معلوماتو د ثبت له پروسې څخه ليدنه وکړه. د بایومتریک معلوماتو د ثبت دا پروسه به د نن ورځې په گډون تر سبا ورځې دوام وکړي او په ترڅ کې به یې د کانکور ازموینې نږدې درې نيم زره گډونوال بایومتریک شي.
پوهنتون رييس له يادې پروسې څخه د ليدنې پرمهال د مسلکي او تخنيکي ډلې د نظم او کارونو له دقت او سرعت څخه خوښي وښوده او د لا ښهوالي په پار يې مسؤلينو لازمې سپارښتنې وکړې.
د يادونې ده چې د ازموینو ملي ادارې له پلان سره سم د کونړ ولایت د ۱۴۰۴ کال کانکور ازموینه به د چهارشنبې، پنجشنبې او جمعې په ورځو د غبرگولي/جوزا پر(۲۸ – ۲۹ – ۳۰مه) نېټه په کونړ سيد جمال الدين افغاني پوهنتون-يارگل بېله کې څخه واخیستل شي.
