د پوهنتون عمومي رئيس په مشرۍ د کتابونو، تأليفي او څېړنيزو آثارو او مونوگرافونو د کتنې شرعي بورډ ناسته وشوه
په ياده کاري ناسته کې د علمي څېړنو او مجلو مرستيال پوهندوی دوکتور سيد اصغر هاشمي او د ياد بورډ غړو گډون درلود، چې په پیل کې د سيد جمال الدين افغاني پوهنتون عمومي رئيس الحاج مولوي عبدالواسع منصور په خپلو خبرو کې له ديني، اخلاقي او فکري پلوه د کتابونو، تأليفي او څېړنيزو آثارو او مونوگرافونو د کتنې اړتيا، ارزښت او اهميت بيان کړ او د بورډ غړو ته يې لارښوونه وکړه چې په دې برخه کې د علمي څېړنو او مجلو له معاونيت سره دوامداره مرسته وکړي او په خپلو چارو کې دې له يو بل سره پوره همغږي او همکاري ولري او خپلې چارې دې په پوره دقت سره ترسره کړي، چې د هغوی له لوري ډاډ ورکړل شو. د ناستې په ترڅ کې د علمي څېړنو او مجلو مرستيال د ياد بورډ د فعاليتونو لارښود تشرېح کړ او د هغوی مسؤلينوته يې روښانه کړل او ورپسې د بېلابېلو ټاکل شويو موضوعاتو په تړاو بحث او پرېکړې وشوې. ياده ناسته چې د قرانکريم د څو مبارکو اياتونو په تلاوت سره پیل شوې وه، په دُعايه کلماتو سره پای ته ورسېده.
