د پوهنتون استادانو ته د څېړنې په تړاو درې ورځنی ورکشاپ پيل شو
دغه درې ورځنی روزنيز ورکشاپ چې د پوهنتون د علمي چارو او د علمي څېړنو او مجلې معاونيتونو په همغږۍ د مسلکي پرمختيا آمريت له لوري د معلوماتي ټکنالوژۍ په مرکز کې جوړ شوی دی، د ياد پوهنتون د پنځهگونو پوهنځيو شاوخوا(۱۵) تنه استادان په کې برخه لري.
د ورکشاپ په پرانيسته کې د پوهنتون علمي چارو مرستيال قاضي عبدالهادي فضلي د څېړنې پر اړتيا او ارزښت هر اړخيزې خبرې وکړې او د ورکشاپ گډونوالو ته يې سپارښتنه وکړه، چې له دې فرصت څخه د خپلې مسلکي پوهې او وړتیا په لوړونه کې اعظمي استفاده وکړي.
ياده دې وي چې د دې درې ورځني ورکشاپ په ترڅ کې به د پوهنتون علمي څېړنو او مجلې مرستيال پوهندوی دوکتور سيد اصغر هاشمي له لوري(د څېړنې پېژندنه، ارزښت، د غوره څېړنې او څېړونکي ځانګړتياوې او همداراز د اند علمي-څېړنيزې مجلې د جوړښت تشرېح)، د زراعت پوهنځي رئيس پوهندوی محمد محسن محمدي لهخوا(د څېړنې ډولونه؛ نمونه پېژندنه او د نمونې سايز تعين)، د اقتصاد پوهنځي استاد پوهنمل دوکتور ذبيح الله کوټوال له لوري(په ساينسي او ټولنيزو علومو کې د مقاله ليکنې محتوايي شننه) او د اند علمي-څېړنيزې مجلې آمر پوهنمل دوکتور احمد راتب شرافت لهخوا(په څېړنه کې د ماخذ ښودنې جوړښت) تر سرليکونو لاندې پر يادو موضوعاتو پرېزنټېشنونه وړاندې شي او همداراز به د گډونوالو پوښتنو او ازاد بحث ته کافي وخت ځانگړی شي.
