د اقتصاد پوهنځي ممتاز محصلین د يوې غونډې په ترڅ کې وستايل شول
په ياده ستاينغونډه کې د سيد جمال الدين افغاني پوهنتون علمي څېړنو او مجلې مرستيال پوهندوی دوکتور سيد اصغر هاشمي، د اقتصاد پوهنځي رييس پوهنيار حامد احمد مراد، د ياد پوهنځي استادانو، اداري کارکوونکو او محصلينو ګډون کړی ؤ.
د پوهنتون علمي څېړنو او مجلې مرستيال پوهندوی دوکتور سيد اصغر هاشمي په خپلو خبرو کې ممتازو محصلينو ته مبارکي وويله او د هغوی هڅې او لاسته راوړنې يې وستایلې.
د اقتصاد پوهنځي رييس پوهنيار حامد احمد مراد په خپله وينا کې د ياد پوهنځي په لاسته راړونو رڼا واچوله او د ممتازو محصلينو هڅې يې د هېواد او ټولنې شريک وياړ وباله. نوموړي د پوهنتون له استادانو مننه وکړه چې د يادو محصلينو په روزنه کې يې نه ستړې کېدونکې هلې ځلې کړې دي.
ياده غونډه ممتازو محصلينو ته د ستاينليکونو له ورکولو وروسته د اقتصاد پوهنځي استاد پوهنمل ذبيح الله کوټوال پر لنډې وينا او دُعايه کلماتو سره پای ته ورسېده.
