د پوهنتون له اداري او خدماتي کارکوونکو څخه په تدريس شوي ديني نصاب کې ازموينه واخېستل شوه
د سيد جمال الدين افغاني پوهنتون د اداري او خدماتي کارکوونکو د ديني معلوماتو د کچې د ارزونې په موخه د پوهنتون د دعوت او ارشاد آمريت له لوري د اداري او خدماتي کارکوونکو څخه د ايمان مجمل او ايمان مفصل؛ د اوداسه، تيمم، غسل او د لمانځه اړوند احکام او مسايل او په نورو تدريس شويو ديني موضوعاتو کې ازموينه واخېستل شوه.
په ياده ازموينه کې د پوهنتون علمي مرستيال استاد صلاح الدين ايوبي، د دعوت او ارشاد آمر مفتي عابدالله عمري او مبلغ مولوي عبيدالله نعماني د ممتحنينو په توگه گډون درلود.
د دې ازموينې د اخېستلو موخه د اداري کارکوونکو د ديني معلوماتو ارزونه او د اسلامي احکامو او اساسي ديني مسايلو په اړه د هغوی د پوهاوي کچې معلومول او لوړول بلل شوي دي.
