ننگرهار پوهنتون محصلینو له سید جمال الدین افغاني پوهنتون څخه لیدنه وکړه
ننگرهار پوهنتون کرنې پوهنځي د هارټيکلچر ديپارتمنت ۳۶ تنو محصلینو د علمي سیر په ترڅ کې له سید جمال الدین افغاني پوهنتون څخه لیدنه وکړه او د دې پوهنتون، کرنې پوهنځي د څېړنيز فارم او په ياد فارم کې تر کار لاندې او ترسره شويو څېړنو پروژو په اړه یې هر اړخیز معلومات ترلاسه کړل.
د ياد سفر په ترڅ کې راغلو محصلینو او استادانو د سید جمال الدین افغاني پوهنتون د محصلانو چارو مرستیال پوهنمل علي احمد بهار او د کرنې پوهنځي رييس پوهندوی محمد حسن محمدي سره ولیدل.
پوهنمل علي احمد بهار راغلو محصلینو ته د ښه راغلاست ترڅنگ؛ د علمي سفرونو پر اړتیا او اهمیت خبرې وکړې او په عملي زدهکړه کې يې یاده چاره مؤثره وبلله او هغوی ته يې د هر راز همکارۍ ډاډ ورکړ.
ننگرهار پوهنتون د کرنې پوهنځي استاد پوهندوی دوکتور گلبدین گلاب په خپلو خبرو کې د سید جمال الدین افغانی پوهنتون له مشرتابه څخه د امکاناتو د چمتو کولو له امله مننه وکړه.
د يادونې ده چې راغلو محصلينو ته د سيد جمال الدين افغاني پوهنتون له لوري د دې سفر په ترڅ کې لازمې اسانتاوې هم برابرې شوې وې.
