کونړ ولايت کې د دیني مدارسو د عالمیې او عالیې مرحلو کلنۍ ازموینه پیل شوه

ياده ازموینه د کونړ ولايت د سيد جمال الدين افغاني پوهنتون په انگړ کې د پوهنتون رييس شيخ عبدالمالک محسن، د محصلانو چارو مرستيال پوهنمل علي احمد بهار، د ولايت مقام استازي مولوي مير ولي حقاني، له مرکز کابل څخه راغليو اعلی نگرانانو: مولوي احمدگل منهاج او مولوي سيد رحمن انصاري، نگران علماء کرامو او فاضلانو په حضور کې رسماً پیل شوه.

د پوهنتون رييس شيخ عبدالمالک محسن په خپلو خبرو کې گډونوالو ته د ازموينې په اړه لازم معلومات ورکړل او هغوی ته يې د پوره نظم سپارښتنه وکړه.

د يادونې ده چې دا ازموينه به د لوړو زده کړو وزارت د دیني جامعاتو او تخصصاتو لوی ریاست له لوري د ټول هېواد سربېره د کونړ ولايت د امارتي او خصوصي دیني مدارسو څخه په ۱۴۴۶ هـ. ق کال کې له(492) تنو فاضلانو څخه چې(286) تنه یې د عالمیې او(206) تنه يې د عاليې مرحلو فارغ فاضلان دي؛ د شپږو ورځو په ترڅ کې له ټاکل شوي مهالوېش سره سمه واخېستل شي.