پوهنتون کې محصلينو ته د کار موندنې له معیاري مېتودونو سره د بلدتیا په موخه د سېمينارونو لړۍ پيل شوه
سيد جمال الدين افغاني پوهنتون د محصلانو چارو معاونيت په همکارۍ د مسلکي پرمختيايي مرکز له لوري د څلورمو ټولگيو محصلينو ته د(سي وي) ليکلو او چمتو کولو، د دندې لټون سايټونو معرفي کولو او د مرکې(انټرويو) مهارتونو د پېژندنې په اړه د سېمينارونو لړۍ پيل شوه چې د پنځهگونو پوهنځيو محصلين به په کې په نوبت وار شکل برخه واخلي.
د ورکشاپ په پرانېسته کې پوهنتون د مسلکي پرمختيايي مرکز آمر پوهنيار امان الله توتاخېل په خپلو خبرو کې د ياد سېمينار په اړه معلومات ورکړل او د خپلو راتلونکو پلانونو يادونه يې وکړه. نوموړي همداراز له گډونوالو وغوښتل چې په فعال گډون سره د سېمينار له ټولو مطالبو پوره گټه واخلي.
هېره دې نه وي ده، چې د داير شوي سېمينار چارې به د کمپيوټرساينس پوهنځي رييس پوهنيار ذاکرالله عزام له لوري پر مخ وړل کېږي. د يادولو ده چې گډونوالو د دې ډول سېمينارونو پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
