سيد جمال الدين افغاني پوهنتون د رييس پوهنمل محب الله محب په مشرۍ د پوهنتون رهبري شورا ناسته وشوه
په ياده ناسته کې د علمي چارو مرستيال پوهندوی ميرويس ستانکزي، د علمي څېړنو او مجلې مرستيال پوهندوی دوکتور سيد اصغر هاشمي، د محصلانو چارو مرستيال پوهنمل علي احمد بهار، د مالي او اداري چارو مرستيال قاري رحمن الله صادق، د پوهنځيو ريیسانو او د ازموينو مرکزي کمېټې مشر گډون درلود، چې د تېر سمستر د ازموينو گزارش، راتلونکي سمستر ته د چمتووالي، د تحصيلي نصاب بشپړ تطبيق، د عمومي کتابتون پراختيا او نورو بېلا بېلو موضوعاتو په اړه په کې بحث او پرېکړې وشوې.
پيل کې د پوهنتون رييس پوهنمل محب الله محب د ښه راغلاست ترڅنگ د راتلونکي سمستر د تدریسي بهير د لا ښه والي او د نورو موضوعاتو په پار اړوندو مسؤلینو ته لازمې سپارښتنې او لارښوونې وکړې.
د ازموینو مرکزي کمېټې مشر پوهنمل نورالحق حليمي د تېر سمستر د ازموينو گزارش د پوهنتون مشرتابه ته وړاندې کړ او زياته يې کړه چې د کمېټې د غړو په مرسته يې د ازموینو د اخیستلو له بهیر څخه په منظمه توگه څارنه کړې ده.
د بحث په ترڅ کې د پوهنتون مشرتابه د يادو موضوعاتو تر څنگ پر يو شمېر نورو بېلا بېلو مسايلو بحث او پرېکړې وکړې.
