د عاليې او عالمیې مرحلو د کلنيو ازموينو مديره هيئت د پوهنتون عمومي رئيس په مشرۍ مشورتي ناسته وکړه
په کونړ ولايت کې د عاليې او عالمیې مرحلو د کلنۍ ازموينې مديره هيئت د سيد جمال الدين افغاني پوهنتون د عمومي رئيس په مشرۍ د يادې ازموينې د لا ښه تنظیم او غوره مديريت په موخه مشورتي ناسته وکړه.
په دغه ناسته کې د پوهنتون عمومي رئيس او د ياد هيئت مشر الحاج مولوي عبدالواسع منصور د ديني مدارسو د ۱۴۴۷ هـ . ق کال د رجب المرجب مياشتې د کلنۍ ازموينې په هکله معلومات وړاندې کړل او همداراز د هيئت ټولو غړو له بحث وروسته د نگرانانو، د ازموينې هالونو او نورو بېلابېلو موضوعاتو په اړه پرېکړې وکړې.
هېره دې نه وي چې د يادو ازموينو مديره هيئت د پوهنتون عمومي رئيس په مشرۍ د ولايت مقام، د علماوو شورا، جهادي مدرسې او معارف رياست له استازو څخه جوړ دی چې په کونړ ولايت کې د ديني مدارسو د سږ کال ازموينو د تنظیم او مديريت مسؤليت پر غاړه لري.
