پوهنتون د علمي شورا نوبتي ناسته وشوه
ياده ناسته چې د سيد جمال الدين افغاني پوهنتون علمي چارو مرستيال قاضي عبدالهادي فضلي په مشرۍ وشوه، د محصلانو چارو مرستيال مفتي شېرافضل منصور، د مالي او اداري چارو مرستيال حافظ مولوي محمدعثمان سعيد، د پوهنځيو ريیسانو او استادانو په کې برخه لرله.
پوهنتون د علمي چارو مرستيال د پرانیستې وینا پر مهال په اسلامي شريعت کې د شورا پر مقام، ارزښت او اهميت هر اړخيزې خبرې وکړې او ورپسې د پوهنتون مرستيالانو د وږي مياشتې کاري راپورونه له شورا سره شريک کړل او همداراز د تېرې علمي شورا د پرېکړو گزارش وړاندې شو.
په دغه کاري ناسته کې د پوهنځيو په کچه د ستراتيژيک پلانونو د ترتيب او تدوين، د روان سمستر شل سلنه(٪۲۰) ازموينو پیل، د وترنرۍ علومو پوهنځي ايجاد، په زراعت پوهنځي کې د ماسترۍ برنامې او د نباتاتو ساتنې ديپارتمنت ايجاد او د يو شمېر نورو موضوعاتو په اړه بحث او پرېکړې وشوې. ياده ناسته د خیر په دُعا پای ته ورسېده.
