د لوړو زدهکړو وزارت مالي او اداري معين مولوي حافظ محمد حامد حسیب کونړ ولايت ته د خپل کاري سفر په ترڅ کې له سيد جمال الدين افغاني پوهنتون څخه ليدنه وکړه
نوموړي همدارنگه يوې سترې غونډې ته چې د کونړ ولایت مرستيال والي، د ياد پوهنتون مشرتابه پلاوي، د ولايتي ادارې رييسانو، د کونړ ولایت جیدو علماء کرامو، استادانو، اداري کارکوونکو او محصلينو په کې گډون کړی ؤ، وينا وکړه.
مالي او اداري معين په خپلو خبرو کې وويل چې د ا.ا.ا مشران د باکيفيته زدهکړو لپاره د مناسب چاپېريال برابرولو په برخه کې پوره هڅې کوي او د لوړو زدهکړو وزارت ژمن دی چې د پوهنتونونو ټولې اړتياوې پر خپل وخت پوره کړي.
غوندې ته د کونړ مرستيال والي مولوي عبدالله حقاني وويل چې د ا.ا.ا مشران ديني او عصري زدهکړو ته ژمن دي او په دې برخه کې د پوره سهولتونو برابرولو لپاره کوښښ کوي.
په ورته وخت کې د سيد جمال الدين افغاني پوهنتون مشرتابه د خپلو خبرو پرمهال د لوړو زدهکړو وزارت د مالي او اداري معين په راتگ خوښي وښوده او په یو شمېر برخو کې یې خپلې ستونزې او غوښتنې ورسره شريکې کړې، چې د هغه له لوري ورته د ستونزو د حل او غوښتنو د پوره کېدو ډاډ ورکړل شو.
