د پوسټر پرېزېنټېشن په بڼه د څېړنيزو پروژو پايلې شريکې شوې
سيد جمال الدين افغاني پوهنتون د اقتصاد پوهنځي(۹۶) تنو محصلينو له لوري د ترسره شويو څېړنو پايلې د پوسټر پرېزېنټېشن په بڼه له ټولنې سره شريکې شوې، چې په مراسمو کې يې د پوهنتون مسؤلينو، استادانو، محصلينو او د بېلابېلو ولايتي ادارو، مؤسساتو او بانکونو استازو او د تنوير لوړو زدهکړو خصوصي مؤسسې مشرتابه او استادانو گډون کړی ؤ.
د ياد پوهنتون رييس شيخ عبدالمالک محسن د تحقيق پر اهميت او ارزښت خبرې وکړې او محصلین یې لا نورو څېړنو او نوښتونو ته وهڅول. نوموړي څېړنه د يو هېواد د پرمختگ لپاره مهمه لار وبلله او په دې برخه کې يې د لوړو زدهکړو وزارت او د دې پوهنتون له وروستيو اقداماتو يادونه وکړه. د پوهنتون رييس په خپلو خبرو کې د ښه ژوندانه لپاره اقتصاد يو مهم اصل وباله او د دې برخې پياوړتيا او هېواد د ځانبسياينې لپاره يې د علمي کادر غړو ته د لا نورو څېړنو او نوښتونو سپارښتنه وکړه.
پوهنتون د علمي څېړنو او مجلې مرستيال پوهندوی دوکتور سيد اصغر هاشمي په خپله وينا کې اقتصاد د يوې ټولنې پاييدو لپاره مهمه وسيله وبلله او په دې برخه کې يې د عصر له غوښتنو سره سم د نويو لارو چارو اړتيا په ډاگه کړه. نوموړي همداراز د نورو پوهنځيو مسؤلينو ته د ورته پروگرامونو د دايرېدو سپارښتنه وکړه.
د اقتصاد پوهنځي رييس پوهنيار حامد احمد مراد په خپله وينا کې د ياد پوهنځي له فعاليتونو، پرمختگونو، پلانونو او لاستهراوړنو يادونه وکړه او د دې ستر علمي گام په ترتيب او تنظیم کې يې له اړوندو برخو مننه وکړه. ورپسې محصلينو د خپلو څېړنو پايلې د غونډې برخهوالو ته د پوسټر پرېزېنټېشن په بڼه وړاندې کړې او په اخر کې ياد مراسم د خير په دُعا پای ته ورسېدل.
