پوهنتون د علمي چارو مرستيال د پوهنځيو رييسانو او د ديپارتمنتونو له آمرينو سره ناسته وکړه
سيد جمال الدين افغاني پوهنتون د علمي چارو مرستيال قاضي عبدالهادي فضلي د پوهنځيو رييسانو او د ديپارتمنتونو له آمرينو سره د راتلونکي کانکور ازموينې لپاره د ښوونځيو زدهکوونکو ته د عامه پوهاوي پروگرام په تړاو د چمتووالي په پار مشورتي ناسته وکړه.
يادې ناستې ته د علمي چارو مرستيال په چارو کې د اطاعت او اخلاص پر ارزښت خبرې وکړې او گډونوالو ته يې لارښوونه وکړه چې د محصلينو په سالمې روزنې سره د ټولنې په فکري او اصلاحي برخه کې ورسپارل شوی مسؤليت سرته ورسوي. نوموړي کانکور ازموينه پوهنتونونو ته د ورتگ يوازېنۍ لار ياده کړه او په تړاو يې د ښوونځيو د زدهکوونکو پوهاوی اړين وباله. د ناستې په ترڅ کې د گډونوالو له لوري د(پوهنځيو په انتخاب کې د محصلينو پر وړاندې ستونزې) موضوع په اړه بحث وشو او د ياد پروگرام لپاره ځانګړې کمېټه وټاکل شوه.
کانکور ازموینه چې په هېواد کې له ۱۳۳۹ هـ.ش کال را په دې خوا هر کال پوهنتونونو ته د وړ ځوانانو د ورپېژندنې په موخه اخيستل کېږي، سږ کال به د ټاکل شوي ظرفیت له مخې(۳۰۰۰) تنه په ماسترۍ،(۷۶۴۰۰) تنه په لېسانس او شاوخوا(۳۳۵۵۰) تنه په نیمه لوړو زدهکړو بنسټونو کې جذب شي.
