کونړ ولايت کې عمومي کانکور ازموينې د بايومتريک معلوماتو د ثبت بهير پيل شو
په کونړ سيد جمال الدين افغاني پوهنتون کې د ۱۴۰۵ کال عمومي کانکور ازموينې د گډونوالو د بايومتريک معلوماتو د ثبت بهير پيل شو او په چټکۍ سره روان دی.
د پوهنتون عمومي رئيس الحاج مولوي عبدالواسع منصور د بايومتريک معلوماتو د ثبت له پيل شوي بهير څخه د ليدنې پرمهال د مسلکي او تخنيکي ډلې د نظم او کارونو له دقت او سرعت څخه خوښي وښوده او د لا ښهوالي په موخه يې اړوندو مسؤلينو ته لازمې سپارښتنې او لارښوونې وکړې. د ازموينو عمومي ادارې د مسؤلينو په وينا د بايومتريک معلوماتو د ثبت بهير به د نن ورځې په گډون تر سبا ورځې دوام ولري او په ترڅ کې به يې د کانکور ازموينې څه باندې درې نيم زره گډونوال بايومتريک شي.
د يادونې وړ ده چې د ازموينو عمومي ادارې له پلان سره سم به د کونړ ولايت د ۱۴۰۵ کال عمومي کانکور ازموينه د پنجشنبې، جمعې او شنبې په ورځو چې د ثور مياشتې له(۲۴ – ۲۵ – ۲۶مې) نېټې سره سمون لري، د کونړ په سيد جمال الدين افغاني پوهنتون-يارگل بېله کې واخیستل شي.
