پوهنتون کې استادانو او اداري کارمندانو ته دایر شوی ۳ ورځنی دیني، علمي او اصلاحي سېمینار پای ته ورسېد
په دغه سېمینار کې د کونړ ولايت جيدو علماء کرامو او افتخاري شیوخو له لوري د پوهنتون استادانو او اداري کارمندانو ته د بېلابېلو دیني او علمي موضوعاتو په تړاو تفصيلي بيانونه وشول او برخهوالو دا ډول سېمينارونه ډېر ارزښتمن وبلل. دا سېمينار چې د لوړو زده کړو وزارت په لارښوونه درې ورځې وړاندې د شعبان المعظم مياشتې پر ۱۸ مه نېټه پیل شوی ؤ، د پوهنتون رهبرۍ سربېره نږدې(۱۸۰) تنو استادانو او اداري کارمندانو په کې برخه لرله.
د دغه سېمينار په پيل کې د سيد جمال الدين افغاني پوهنتون رييس شيخ عبدالمالک محسن د سېمینار د دايرېدو پر هدف، اهميت او ارزښت خبرې وکړې او گډونوالو ته يې سپارښتنه وکړه چې په ياد سېمینار کې فعال گډون وکړي.
د ياد درې ورځني سېمينار پر مهال د شیوخو کرامو له لوري ټول هغه موضوعات چې د لوړو زده کړو وزارت د دعوت او ارشاد رياست له لوري ټاکل شوي ؤ په ښه شان سره بيان شول او د گډونوالو پوښتنې يې هم ځواب کړې.
د دې سېمینار د پای په مراسمو کې د پوهنتون علمي چارو مرستيال قاضي عبدالهادي فضلي په خپله ارزوونکې وينا کې د لوړو زده کړو وزارت، شیوخو کرامو، برخهوالو او د سېمینار له تنظيموونکو څخه د مننې ترڅنگ د سېمینار پر ارزښت او اړتیا خبرې وکړې او گډونوالو ته يې سپارښتنه وکړه چې له تدريس شويو موضوعاتو څخه په خپل ژوند کې پوره گټه واخلي. دغه سېمینار چې درې ورځې وړاندې پیل شوی ؤ نن ورځ د پوهنتون دعوت او ارشاد آمر مولوي اعجازالحق زلف په دُعايه کليماتو سره پای ته ورسېد.
