پوهنتون رييس د امر بالمعروف او نهی عن المنکر قانون د بشپړ تطبيق په تړاو تفصيلي بيان وکړ
د سيد جمال الدين افغاني پوهنتون رييس شيخ عبدالمالک محسن د ماسپښين تر لمانځه وروسته د دې پوهنتون استادانو، اداري او خدماتي کارکوونکو او محصلينو ته د امر بالمعروف او نهی عن المنکر قانون د بشپړ تطبيق په تړاو تفصيلي بيان وکړ او د ياد قانون ټول حکمونه يې الهي امر وباله. نوموړي په ټينگار سره وويل چې ټول بايد د دې قانون حکمونه په بشپړ ډول پلي کړو او لارښوونه يې وکړه چې د زيرح(ساهلرونکي) انځورونو له اخيستلو څخه بايد په جدي ډول ډډه وکړئ، د جماعت په لمانځه کې فعال گډون او خپل صورت او سيرت له ديني لارښوونو سره سم برابر کړئ.
