پوهنتون د رييس په مشرۍ شاوخوا(۱۰۰) تنو استادانو او محصلینو له زلزله ځپلو هېوادوالو سره د مرستې په موخه د پېښې سيمې ته سفر وکړ
سيد جمال الدين افغاني پوهنتون د رييس شيخ عبدالمالک محسن په مشرۍ د بېلابېلو پوهنځیو شاوخوا(۱۰۰) تنو استادانو او محصلینو له زلزله ځپلو هېوادوالو سره د مرستې او خوراکي توکو د رسولو په موخه د پېښې سيمې؛ کونړ ولايت د څوکۍ ولسوالۍ دېوهگل درې څپرو ساحې او نورگل ولسوالۍ مزار درې غازي اباد ودېرو کلي ته سفر وکړ او په سيمه کې يې د پېښې له قربانیانو او زیانمنو کورنیو سره د ټپيانو د ژغورنې او شهيدانو د تکفين او تدفين په برخه کې لازمه مرسته او همکاري وکړه.
د پوهنتون رييس د هېواد پر ټولو شتمنو، نړیوالو، ملي او ساحوي خیریه بنسټونو غږ وکړ، چې د یادې پېښې قربانیانو او زیانمنو کورنیو سره لازمه مرسته وکړي او د هغوی لپاره د بیا عادي ژوندانه امکانات او سرپناه برابره کړي.
د ياد پوهنتون رهبري او ټول منصوبین د الله تعالی له درباره شهيدانو ته د لوړو مرتبو دعاء او ټپیانو ته د عاجلې او کاملې روغتیا هيله کوي.
