پوهنتون استادانو او اداري کارکوونکو ته د ناسمو رواجونو مخنيوي(۱۷) گڼه فرمان په هکله د پوهاوي درې ورځنی سېمينار پای ته ورسېد
دغه سېمينار چې د لوړو زدهکړو وزارت په لارښوونه د سيد جمال الدين افغاني پوهنتون د علمي چارو معاونيت په نوښت د شرعياتو پوهنځي په همکارۍ او د فرهنگي چارو کمېټې په هلو ځلو د پوهنتون د غونډو په تالار کې داير شوی ؤ؛ د پوهنتون رهبرۍ، استادانو او اداري کارکوونکو په کې برخه اخيستې وه.
د ياد سېمينار په پيل کې د سيد جمال الدين افغاني پوهنتون رييس شيخ عبدالمالک محسن د سېمینار د دايرېدو پر هدف، اهميت او ارزښت خبرې وکړې او ټول مسؤلين او منسوبين يې پر دې مکلف کړل چې د مشرتابه عالي مقام پر حکمونو او فرمانونه ځان پوه کړي او د ټولنې نورو وگړو ته يې هم ورسوي.
د دغه درې ورځني سېمينار په لړ کې د شرعياتو پوهنځي استادانو هر يو: پوهنمل دوکتور محمدسليم کريمزي په لومړۍ ورځ، پوهندوی عطاءالله حسامي په دويمه ورځ او پوهنيار محمد وسيم حبيبي په وروستۍ ورځ؛ د ياد فرمان د تشرېح او ښه عملي کېدو په تړاو چمتو کړي معلومات وړاندې کړل؛ د فرمان مادې يې وار په وار تشرېح او د گډونوالو پوښتنې يې ځواب کړې.
سېمینار د پای په مراسمو کې؛ د پوهنتون علمي چارو مرستيال قاضي عبدالهادي فضلي په خپله ارزوونکې وينا کې د سېمینار له برخهوالو او تنظيموونکو څخه د مننې ترڅنگ د سېمینار پر ارزښت او اړتیا خبرې وکړې او گډونوالو ته يې سپارښتنه وکړه چې د ياد فرمان په تطبيق کې خپل مسؤليت اداء کړي. غونډې ته د کونړ ولايت د فرمانونو او حکمونو د تعقيب او نظارت رييس مولوي فضل الله محمدي هم وينا وکړه او د مشرتابه عالي مقام د فرمانونو او حکمونو پر تطبيق يې ټينگار وکړ. دغه سېمینار چې درې ورځې وړاندې پیل شوی ؤ، نن ورځ په دُعايه کليماتو سره پای ته ورسېد.
د يادونې ده چې د سېمينار برخهوالو د ياد سېمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه.
