په سید جمال الدین افغاني پوهنتون کې د ۲۷ میلیونه افغانیو په لگښت درې پروژې پرانیستل شوې
د لوړو زده کړو سرپرست وزیر کونړ ولایت ته د خپل رسمي سفر پر مهال په کونړ سید جمال الدین افغاني پوهنتون کې د ۲۷ میلیونه افغانیو په لګښت درې پروژې پرانیستې.
یادې پروژې چې د کونړ سید جمال الدین افغاني پوهنتون د حفظ او مراقبت پروژې او یوه اداري ودانۍ، داخلي سړکونو ترمیمات او ۴۰پایې کمپیوټر لب پېرل په کې شامل دي، د لوړو زده کړو وزارت له بودیجې څخه تکمیل او د دغه وزارت سرپرست له لوري د پټۍ په پرې کولو سره ګټې اخیستنې ته وسپارل شوې.
همدارنګه د لوړو زده کړو سرپرست وزیر شیخ الحدیث مولوي نداء محمد ندیم صاحب یوې سترې ولسي غونډې ته، چې د کونړ ولایت مرستیال والي، امنیې قومندان، د جهادي مدرسې شیوخ کرامو، د کونړ سید جمال الدین افغاني پوهنتون مشرتابه پلاوي، استادانو، محصلینو، د نورستان لوړو زده کړو مؤسسې مشرتابه پلاوي او قومي مشرانو په کې گډون کړی و، وینا وکړه.
نوموړي په خپلو خبرو کې وویل چې د ا.ا.ا مشرتابه د هېواد تحصیلي ډگر د پرمختګ لپاره ډېرې هڅې کړي او تر نورو برخو یې ډېره بودیجه ورته ځانګړې کړې ده.
د لوړو زده کړو سرپرست وزیر د افغانستان خپلواکۍ ته په اشارې سره وویل: "هېڅ بهرني هېواد ته اجازه نه ورکوو چې د افغانستان په داخلي چارو کې مداخله وکړي، اوسمهال افغانستان واحد قیادت لري، د افغانستان خلک د ورورولۍ او یووالي په فضاء کې د یو بل تر څنګ ژوند کوي، ډلې او گوندونه نشته، فساد، غلا او رشوت په کې ختم شوي دي او د چا مرستې او پور ته اړتیا نه لري" .
د سید جمال الدین افغاني پوهنتون رييس پوهنمل محب الله محب په خپلو خبرو کې د لوړو زده کړو سرپرست وزیر او ورسره مل پلاوي ته ښه راغلاست ووايه او د پوهنتون لاسته راوړنې او ستونزې يې ورسره شريکې کړې، چې د هغوی له لوري د حل ډاډ ورکړل شو.
