له شرعياتو پوهنځي څخه ۷۲ تنه محصلين فارغ او د لومړي ځل لپاره په فراغتغونډه کې رسمي تحصيلي اسناد ورکړل شول
سيد جمال الدين افغاني پوهنتون د شرعياتو پوهنځي له دوو څانگو(فقه او قانون او اسلامي تعليماتو) څخه د لېسانس په کچه تر څلور کلنو ديني او تخصصي زدهکړو وروسته په ديارلسمه دوره کې(۷۲) تنه محصلين فارغ او ټولنې ته د خدمت په موخه وړاندې شول.
په همدې موخه جوړه شوې غونډه کې د پوهنتون عمومي رئيس الحاج مولوي عبدالواسع منصور، د پوهنتون مرستيالانو، د پوهنځيو رئيسانو، کونړ د ځېنو ولايتي ادارو مسؤلينو او مېلمنو، د پوهنتون استادانو، فارغېدونکو محصلينو او هغوی د کورنیو غړو گډون کړی ؤ.
غونډه د قرآن کريم د څو مبارکو آیاتونو پر تلاوت پیل شوه او ورپسې د پوهنتون عمومي رئيس الحاج مولوي عبدالواسع منصور په خپله وینا کې فارغېدونکي محصلين مخاطب کړل، چې اوس تاسو ته ډېر مهم مسؤليت متوجه شو نو په سرته رسولو کې يې له اخلاص او صحيح نيت څخه کار واخلئ. نوموړي هغوی ته د لا نورو تخصصي-لوړو زدهکړو او پراخې مطالعې لارښوونه وکړه او زياته يې کړه چې په خپل زدهکړي علم عمل وکړي او په حکمت سره د حق رېښتينې لارې ته نور خلک دعوت کړي.
غونډې ته د کونړ ولایت د جهادي مدرسې مهتمم شيخ عبدالقهار صديقي، د پوهنتون علمي مرستيال قاضي عبدالهادي فضلي، د محصلانو مرستيال مفتي شېر افضل منصور، د شرعياتو پوهنځي رئيس مولوي کليم الله حقاني او نورو ويناوالو په خپلو خبرو کې د علم ارزښت او اهميت بيان کړ او فارغېدونکو محصلينو ته يې مبارکي وويله او همداراز يې هغوی ته د لا نورو لوړو زدهکړو سپارښتنه وکړه او تر فراغت وروسته مسؤليت ته يې متوجه کړل. ورپسې فارغانو ته د مسؤلينو، استادانو او مېلمنو له لوري اسناد ووېشل شول.
د يادونې وړ ده چې په دې فراغتغونډه کې د اسلامي تعليماتو څانگې ۲۸ تنو فارغېدونکو محصلينو ته د فراغت رسمي تحصيلي اسناد(ديپلوم او ترانسکرېپت) ورکړل شول، چې د پوهنتون رهبرۍ له لوري د ستاينليکونو په ورکړې سره، د دې نوښتيزې چارې د ترسره کوونکو مسؤلينو قدراني هم وشوه.
