له زراعت پوهنځي ۱۱۶ تنه محصلين فارغ او د ټولنې خدمت ته وړاندې شول
سيد جمال الدين افغاني پوهنتون د زراعت پوهنځي د لېسانس په کچه تر لوړو زده کړو وروسته ۱۱۶ تنه محصلين فارغ او د ټولنې خدمت ته وړاندې کړل.
۱۴ مه، جمادی الاول، ۱۴۴۵ هـ . ق
په دې تړاو جوړه شوې غونډه کې چې د پوهنتون په تالار کې رابلل شوې وه، د پوهنتون رييس پوهنمل محب الله محب، د علمي چارو مرستيال پوهندوی ميرويس ستانکزي، د محصلانو چارو مرستيال پوهنمل علي احمد بهار، د مالي او اداري چارو مرستيال قاري رحمن الله صادق، د پوهنځيو رييسانو، کونړ د ځېنيو ولايتي ادارو مسؤلينو او مېلمنو، د پوهنتون استادانو، فارغېدونکو محصلينو او هغوی د کورنیو غړو برخه لرله.
پيل کې د قرآن کريم د مبارکو آیاتونو تر تلاوت وروسته د زراعت پوهنځي رييس پوهندوی محمد حسن محمدي د غونډې گډونوالو ته د ښه راغلاست ترڅنگ؛ فارغېدونکو محصلينو او د هغوی کورنيو ته مبارکي وويله.
ورپسې د پوهنتون رييس پوهنمل محب الله محب په خپلو خبرو کې د زراعت پوهنځي له لاسته راوړنو او څېړنيزو پروژو د يادونې ترڅنگ؛ فارغانو او د هغوی کورنيو ته مبارکي ورکړه.
نوموړي هېوالوالو ته ډاډ ورکړ، چې ياد فارغېدونکي مسلکي کادرونه په اسلامي روحيه او د اوسني عصر له غوښتنو سره سم په ډېر حياتي او مهم سکتور(کرنې سکتور) کې روزل شوي دي.
په غونډه کې د فارغانو په استازۍ نسيم الله احساس او فارغېدونکو محصلينو د کورنيو په استازيتوب مولوي حضرت گل مسکين هم ويناوې وکړې.
ياده غونډه فارغانو ته د تصدیق پاڼو له وېش وروسته په دُعايه کلماتو سره پای ته ورسېده.
