سيد جمال الدين افغاني پوهنتون کې د امارت پېژندنې کتاب سیالۍ لس گټونکي محصلین د یوې غونډې په ترڅ کې وستايل شول
ياده سيالۍ چې د لوړو زدهکړو وزارت په لارښوونه او د پوهنتون محصلانو چارو معاونيت په نوښت جوړه شوې وه، د ياد پوهنتون پنځهگونو پوهنځیو نږدې(۲۰۰) تنو محصلینو په کې برخه اخيستې وه.
په همدې موخه جوړو شويو مراسمو کې د پوهنتون مشرتابه، د کونړ ولايت جيدو شيوخو کرامو، د ولايتي ادارې مسؤلينو، د پوهنځيو رييسانو، استادانو او سلگونو محصلينو برخه لرله.
پيل کې د قرآن کريم د مبارکو آیاتونو تر تلاوت وروسته، د سيد جمال الدين افغاني پوهنتون رييس شيخ عبدالمالک محسن د غونډې گډونوالو ته د ښه راغلاست ترڅنگ؛ برياليو محصلينو ته مبارکي وويله او د سياليو له تنظيموونکو يې مننه وکړه، هغه زياته کړه چې په راتلونکي کې به د محصلينو د فکري روزنې په موخه دېته ورته نورې سيالۍ هم برابرې کړي.
د پوهنتون رييس په خپلو خبرو کې امارت پېژندنه نومې کتاب د تاريخ غوره لنډيز او د حقايقو ټولگه وبلله، نوموړي وويل: الله ﷻ د ځمکې واک هغه چاته سپاري چې د مظبوط ايمان خاوند وي.
ورپسې د کونړ ولايت جهادي مدرسې مشر شيخ الحديث مولوي رحمت دين مدني په اسلامي تاريخ کې د خلافتونو په تاريخي بهير مفصلې خبرې وکړې او د اسلامي نصوصو په رڼا کې يې د الله ﷻ پر ځمکه مشري د مسلمانانو حق وباله.
غونډې ته د امر بالمعروف، نهي عن المنکر او شکايتونو اورېدلو رييس مفتي محمد ياسين حقپرست هم وينا وکړه او دا برنامه يې د محصلينو د فکري او اصلاحي روزنې لپاره گټور اقدام ياد کړ.
د يادونې ده چې په سیالۍ کې مخکښو بریالیو محصلینو ته لپټاپ کمپيوټرونه او نورې بېلا بېلې ډالۍ ورکړل شوې.
