د پوهنتون رئیس له اداري او خدماتي کارکوونکو سره ناسته وکړه
د سيد جمال الدين افغاني پوهنتون رئيس الحاج مولوي عبدالواسع منصور، د مالي او اداري چارو مرستيال حافظ مولوي محمدعثمان سعيد په حضور کې د پوهنتون له اداري او خدماتي کارکوونکو سره ناسته وکړه.
د پوهنتون رئیس په خپلو خبرو کې ياد کارکوونکي مخاطب کړل چې ستاسو هڅې او زحمتونه د پوهنتون لپاره د ښه مديريت، منظم او پاک چاپېريال په برخه کې د قدر وړ دي او متوجه يې کړل چې په پوره اخلاص، ايماندارۍ او صحيح نيت سره خدمت وکړي نو دا به يې په عبادت کې حسابېږي. نوموړي وويل، چې په اداره کې به هر ډول امتياز يوازې د خدمت په بدل کې ورکول کېږي.
په دغه ناسته کې يادو کارکوونکو خپلې ستونزې او غوښتنې د پوهنتون له مشرتابه سره شریکې کړې او د پوهنتون رئيس له لوري ډاډ ورکړل شو چې ستونزو او غوښتنو ته به يې ژر رسېدنه وشي او همداراز يې هغوی ته سپارښتنه وکړه چې په اړوندو چارو کې د آمرینو پوره اطاعت وکړي او خپل کارونه پر ټاکلي وخت انجام کړي. ياده ناسته د خیر په دُعاء سره پای ته ورسېده.
