د يوې غونډې په ترڅ کې د ترسره شویو څېړنو پایلې له اړوندو ادارو او گډونوالو سره شریکې کړې
سيد جمال الدين افغاني پوهنتون د ښوونې او روزنې پوهنځي د پښتو ژبې او ادب دپيارتمنت استادانو له لوري د ترسره شويو څېړنو پايلې له اړوندو ادارو سره شريکې شوې، چې په مراسمو کې يې د پوهنتون رييس شيخ عبدالمالک محسن، د علمي چارو مرستيال قاضي عبدالهادي فضلي، د مالي او اداري چارو مرستيال حافظ مولوي محمدعثمان سعيد، د علمي څېړنو او مجلې مرستيال پوهندوی دوکتور سيد اصغر هاشمي، د پوهنځيو رييسانو، کونړ ولايت د اطلاعاتو او فرهنگ رياست او د ملي راډيو تلوېزيون آمريت استازيو، د پوهنتون استادانو او محصلينو برخه لرله.
غونډې ته د پوهنتون رييس په خپلو خبرو کې په ترسره شويو څېړنو خوښي وښوده او زیاته یې کړه، چې افغانان ډېر پياوړي استعدادونه لري نو له دغو استعدادونو څخه بايد د هېواد ترقۍ او ابادۍ لپاره گټه واخيستل شي. نوموړي همداراز د پروگرام له تنظيموونکو مننه وکړه چې د تضمين کيفيت د معيارونو په رڼا کې د خپلو څېړنو پايلې له اړوندو ادارو سره شريکوي.
پوهنتون د علمي چارو مرستيال غونډې ته د وينا پر مهال نورو ديپارتمنتونو ته سپارښتنه وکړه چې د پښتو ژبې او ادب ديپارتمنت په څېر دې د خپلو څېړنو پايلې له اړوندو ادارو سره د تضمين کيفيت له معيارونو سره سمې شريکې کړي.
غونډې ته د پښتو ژبې او ادب ديپارتمنت آمر پوهنيار محمد داؤد مبارز او کونړ ولايت د اطلاعاتو او فرهنگ رياست استازي جنت گل فدا تر خبرو وروسته د علمي څېړنو او مجلې مرستيال او د پښتو ژبې او ادب ديپارتمنت استاد پوهندوی دوکتور سيداصغر هاشمي د تر سره شويو څېړنو پایلې د پرېزېنټېشن په بڼه له گډونوالو سره شريکې کړې او د هغوی پوښتنې يې هم ځواب کړې. غونډه د ښوونې او روزنې پوهنځي رييس پوهنيار مولوي خانزاده حنيفي له لوري په دعايه کلماتو سره پای ته ورسېده.
