د زراعت پوهنځي محصلينو ته له کتابتون څخه د استفادې او گټې اخيستنې په تړاو د پوهاوي سيمينار وړاندې شو
د سيد جمال الدين افغاني پوهنتون د علمي څېړنو معاونيت له پلان سره سم د زراعت پوهنځي محصلينو ته له کتابتون څخه د استفادې او گټې اخيستنې په هکله معلوماتي سيمينار وړاندې شو.
دغه سيمينار چې د زراعت پوهنځي د اگرانومي څانگې استاد پوهنمل حميدالله حميد له لوري وړاندې شو، محصلينو ته يې د کتابتون ارزښت، د ګټورې مطالعې لارې چارې، په کتابتون کې د مطالعې اصول او نورو موضوعاتو په تړاو تفصيلي معلومات وړاندې کړل. نوموړي د مطالعې پر ارزښت او اهميت ټينگار وکړ او همداراز يې د محصلينو پوښتنې هم ځواب کړې.
د يادونې وړ ده چې گډونوالو محصلينو د سيمينار پر دايرېدو خوښي وښوده او په راتلونکي کې يې د ورته نورو پروگرامونو د جوړېدو غوښتنه وکړه. هېره دې نه وي چې په ياد پوهنتون کې تر دې وړاندې هم دې ته ورته علمي او معلوماتي سيمينارونه او کنفرانسونه داير شوي او په راتلونکي کې به هم دا لړۍ دوام ولري.
