ختيځ زون د پوهنتونونو لپاره د لوړو زده کړو محترم وزارت د دعوت او ارشاد ځانگړي استازي د يوه پلاوي په مشرۍ له سيد جمال الدين افغاني پوهنتون څخه ليدنه وکړه
ياد پلاوي ته د ښه راغلاست په موخه جوړه شوې غونډه چې د ياد پوهنتون د دعوت او ارشاد آمر مولوي اعجازالحق زلِف له لوري د قرانکريم د څو مبارکو اياتونو په تلاوت سره پيل شوه، په سر کې د سيد جمال الدين افغاني پوهنتون رييس شيخ عبدالمالک محسن راغلي پلاوي ته ښه راغلاست ووايه او د دعوت او ارشاد په برخه کې يې د پوره پاملرنې ډاډ ورکړ. ورپسې د ختيځ زون پوهنتونونو لپاره د لوړو زده کړو محترم وزارت د دعوت او ارشاد په برخه کې ځانگړي استازي او د ننگرهار پوهنتون د محصلانو چارو مرستيال شيخ شاکرالله وحدت په خپلو خبرو کې د محصل پر وړاندې د پوهنتون مسؤلينو او استادانو له مسؤليتونو يادونه وکړه او محصل ته د تخصص انتقال او د هغه ديني، فکري او مذهبي مصؤنيت يې د هغوی مهم مسؤليتونه ياد کړل. په پای کې ياده ناسته د ښوونې او روزنې پوهنځي رييس پوهنيار مولوي خانزاده حنيفي له لوري په دُعايه کلماتو سره پای ته ورسېده.
ياده دې وي چې د راغلي پلاوي مشر شيخ شاکرالله وحدت د ليليې په مسجد کې هم محصلينو ته اصلاحي بيان وکړ او هغوی يې خپلو اينده مسؤليتونو ته متوجه کړل.
