پوهنتون د علمي چارو مرستيال د خپل معاونيت اړوند کمېټو له مسؤلينو سره ناسته وکړه
سيد جمال الدين افغاني پوهنتون د علمي چارو معاون قاضي عبدالهادي فضلي د چارو د لا ښه والي په موخه د ياد معاونيت تر چتر لاندې د کمېټو له مسؤلينو سره ناسته وکړه چې په کې د تضمین کیفیت آمر پوهنيار انتظار صديقي په گډون د فرهنگي چارو، تضمین کیفیت، نصاب او برېښنايي زدهکړو عمومي کمېټو مشرانو او غړو برخه لرله.
علمي چارو مرستيال د کمېټو مسؤلينو ته سپارښتنه وکړه چې د روان کال راپورونه او د راتلونکي کال پلانونه دې پر خپل له ياد معاونيت سره شريک کړي. نوموړي زياته کړه چې په راتلونکې اونۍ کې به د دې معاونيت له لوري د يادو کمېټو ارزونه هم پیل شي.
په ياده کاري ناسته کې د علمي چارو معاونيت اړوند کمېټو خپلې ستونزې، غوښتنې او وړانديزونه د پوهنتون له علمي مرستيال سره شريک کړل، چې د نوموړي له لوري ورته ستونزو د حل او غوښتنو د پوره کېدو ډاډ ورکړل شو.
