د سيد جمال الدين افغاني پوهنتون لپاره نويو ايجاد شويو بستونو ته ۱۵ تنه مديران ور وپېژندل شول
سيد جمال الدين افغاني پوهنتون د ۱۴۰۲ کال په تشکيل کې نويو ايجاد شويو بستونو ته د ازادې سيالۍ او شفافې پرورسې له لارې ۱۵ تنه مديران بريالي شوي وو، چې نن ورځ رسماً خپلو کارونه ته ور وپېژندل شول.
په دې اړه جوړې شوې غونډې ته د پوهنتون رييس پوهنمل محب الله محب په خپلو خبرو کې نويو ټاکل شويو مديرانو ته د بري هيله وکړه او زياته يې کړه چې دنده امتیاز نه بلکې، یو مسؤلیت دی او هر مسؤلیت چې چا ته سپارل کېږي بايد په ښه ډول يې ترسره کړي، نوموړي همداراز د پوهنتون ټولو منسوبينو ته سپارښتنه وکړه چې د پوهنتون موخو ته د رسېدو په پار له یو او بل سره په همکارۍ او مشوره کار وکړي تر څو ټولې چارې پر وخت او په ښه ډول ترسره شي.
ياده دې وي چې لوړو زده کړو وزارت د ۱۴۰۲ کال په تشکيل کې د هېواد په کچه نږدې ۲۵۰۰ بستونه ايجاد کړل چې د گمارنې لړۍ يې د ازادې سيالۍ او شفافې پرورسې له لارې د هېواد په ټولو امارتي پوهنتونونو کې پيل شوې ده.
