د دقيقې احصايې را ټولولو په موخه د لوړو زده کړو وزارت هيئت کونړ ولايت ته سفر وکړ
ياد پلاوي د راتلونکي ۱۴۰۳ مالي کال د بودجې ترتيب لپاره د استادانو، محصلينو، اداري او خدماتي کارکوونکو او مصارفاتي وسايلو او وسايطو د دقيقې احصايې معلومولو په پار دې ولايت ته سفر وکړ.
له پوهنتونونو د دقيقې احصايې راټولولو لپاره د لوړو زده کړو وزارت له لوري ټاکل شوي پلاوي د خپل سفر په ترڅ کې د سيد جمال الدين افغاني پوهنتون له مشرتابه سره وليدل.
د سيد جمال الدين افغاني پوهنتون رييس پوهنمل محب الله محب راغلي پلاوي ته ښه راغلاست ووايه او د يادې احصايې راټولولو په برخه کې يې د پوره همکارۍ ډاډ ورکړ، چې د راغلي هيئت مشر او د مالي او حسابي رياست مالي آمر صفي الله اخوندزارده ترې مننه وکړه.
ټاکل شوي پلاوي د دې کاري سفر په ترڅ کې د پوهنتون له مشرتابه سره تر کتنې وروسته د اداري برخې له منسوبينو سره ناسته وکړه او همداراز يې د پوهنتون ځينې برخې له نږدې وليدې.
راغلي پلاوي د مسؤلينو او محصلينو ستونزې او وړاندیزونه واورېدل او ژمنه يې وکړه چې د حل په موخه به يې د وزارت له محترم مقام سره شریک کړي.
