پوهنتون کې د فکري پوهنې يو ورځنی سېمينار داير شو
سيد جمال الدين افغاني پوهنتون کې د فکري پوهنې او فرهنگي يرغل د مخنيوي په تړاو په داير شوي سېمينار کې د پوهنتون مشرتابه، د پوهنځيو رييسانو، استادانو، اداري کارمندانو او محصلينو برخه لرله.
پيل کې د قرآن کريم د مبارکو آیاتونو تر تلاوت وروسته د پوهنتون رييس شيخ عبدالمالک محسن په خپله وينا کې د ښه راغلاست ترڅنگ په علمي بنسټونو کې د دا ډول سېمينارونو دايرول ډېر گټور وبلل او د ياد سېمينار له تنظيموونکو يې مننه وکړه. نوموړي استادانو ته سپارښتنه وکړه چې د راتلونکي نسل په سالمه روزنه کې خپل ورسپارل شوی مسؤليت په ښه شان سره اداء کړي او د محصلينو فکري بيدارۍ لپاره دې پوره هڅه وکړي. د پوهنتون رييس د غونډې برخهوال مخاطب کړل چې د غربي رسنيو زهرجنو تبليغاتو پر وړاندې دې کلکه مبازه وکړي.
ورپسې د کونړ ولایت د علماوو شورا رييس شيخ عبدالقهار صديقي(نظام د مخالفينو د ناوړه تبليغاتو مخنيوی)، د پوهنتون استادانو: پوهندوی محمدرحيم خاکسار(د فکري او فرهنگي يرغل پر وړاندې مبارزه) او پوهنيار عبدالولي حميدي(له فکري او فرهنگي يرغلونو سره په مبارزه کې د استادانو، محصلينو او ځوانانو رول) تر سرليکونو لاندې پر ټاکل شويو موضوعاتو تفصيلي ويناوې وکړې. ياد سېمينار د شرعياتو پوهنځي رييس مولوي سراج الدين عمر منصور له لوري په دُعايه کلماتو سره پای ته ورسېده.
