په کونړ کې د ۱۴۰۴ کال کانکور ازموینې بهير نن ورځ رسماً پای ته ورسېد
یاده پروسه چې دوه ورځې یې د گډونوالو د بایومتریک معلوماتو ثبت او درې ورځې یې د ازموینو اخیستلو ته ځانگړې شوې وې؛ له نږدې درې نيم زره تنو گډونوالو څخه د ازموینې په اخیستلو سره نن ورځ د ۱۴۰۴ل کال د جوزا پر ۳۰ مه نېټه رسماً پای ته ورسېده.
د سید جمال الدین افغاني پوهنتون ريیس شيخ عبدالمالک محسن د کانکور ازموینې بهير د بریالي پای ته رسېدو په برخه کې د ازموینو ملي ادارې څخه راغلي پلاوي، امنيتي مسؤلينو او د پوهنتون له منسوبينو څخه مننه وکړه چې په زيار او هڅو يې په دې ولايت کې د ۱۴۰۴ کال کانکور ازموينه په شفاف ډول او د امن په فضاء کې؛ پرته له کوم ځڼډ او خڼډ څخه پای ته ورسېده.
د ازموینو ملي ادارې څخه د راغلي پلاوي مشر استاد احمدنويد نوري په خپلو خبرو کې د ياد پوهنتون له مشرتابه، استادانو، اداري او خدماتي کارکوونکو څخه مننه وکړه چې د ازموینې پرمهال یې د بایومتریک له تخنيکي ډلې او د ازموينې له ممتحنه پلاوي سره پوره همکاري وکړه.
