محصلينو ته له کتابتون څخه د گټې اخېستنې لارې چارې تر سرليک لاندې درې ورځنی ورکشاپ پيل شو
دغه ورکشاپ چې د سيد جمال الدين افغاني پوهنتون علمي څېړنو او مجلې معاونيت په نوښت د پوهنتون په عمومي کتابتون کې جوړ شوی دی، د پنځهگونو پوهنځيو لسگونه محصلينو په کې برخه لري.
ورکشاپ د پرانیستې پر مهال د علمي چارو مرستيال او د پوهنتون سرپرست قاضي عبدالهادي فضلي د اسلامي تاريخ په رڼا کې د کتاب لوستنې او مطالعې پر ارزښت خبرې وکړې او له محصلینو يې وغوښتل چې مطالعه د خپل ځاني او مسلکي پرمختگ لپاره معمول وگرځوي او هره ورځ کتاب لوستنې لپاره ځانگړی وخت بېل کړي.
ورپسې د علمي څېړنو او مجلې مرستيال پوهندوی دوکتور سيد اصغر هاشمي د ورکشاپ په اړه معلومات وړاندې کړل او گډونوالو ته يې د کتابتون اصولو مراعتولو، د مطالعې وخت پېژندلو، په خپلو تحصیلي رشتو کې د څېړنې لپاره د کتابتون له کتابونو څخه د گټې اخېستلو او مطالعې د ارزښت او گټو اړوند اړینې سپارښتنې وکړې او له هغوی يې وغوښتل چې په خپل فعال گډون سره له دې فرصت څخه اعظمي گټه واخلي.
د ورکشاپ په لومړۍ ورځ پوهنتون د علمي څېړنو آمر پوهندوی محمد رحيم خاکسار(له کتابتون څخه د گټې اخېستنې اصول) او د ښوونې او روزنې پوهنځي استاد پوهنيار حميدالله حميد(د گټورې مطالعې لارې چارې) تر سرلیکونو لاندې خپل چمتو کړي پرېزنټېشنونه وړاندې کړل او د گډونوالو پوښتنې يې ځواب کړې.
