له شرعياتو پوهنځي څخه ۹۳ تنه محصلين فارغ او د ټولنې خدمت ته وړاندې شول
په همدې موخه جوړه شوې غونډه کې د پوهنتون رييس شيخ عبدالمالک محسن، د پوهنتون مرستيالانو، د پوهنځيو رييسانو، کونړ د ځېنيو ولايتي ادارو مسؤلينو او مېلمنو، د دې پوهنتون او د ننگرهار پوهنتون استادانو، فارغېدونکو محصلينو او هغوی د کورنیو غړو گډون کړی ؤ.
غونډه د قرآن کريم د څو مبارکو آیاتونو پر تلاوت پیل شوه او ورپسې د شرعياتو پوهنځي استاد پوهنمل محمد سليم کريمزي د ښه راغلاست وینا وکړه او فارغېدونکو محصلينو او د هغوی کورنيو ته مبارکي وويله.
غونډې ته د پوهنتون رييس شيخ عبدالمالک محسن په خپله وینا کې فارغېدونکي محصلين مخاطب کړل، چې اوس تاسو ته ډېر مهم مسؤليت متوجه شو نو ټولنې د روحاني او اجتماعي اړخ اصلاح ته به پوره پاملرنه کوئ. نوموړي هغوی لا نورو لوړو زدهکړو او پراخې مطالعې ته وهڅول.
غونډې ته د شرعياتو پوهنځي رييس مولوي عبدالمنان عارف، د کونړ ولايت د امر بالمعروف - نهي عن المنکر او د شکايتونو اورېدلو رييس مفتي محمد ياسين حقپرست، پوهنتون د دعوت او ارشاد آمر مولوي اعجازالحق زلف، د والدينو په استازۍ مفتي عزت الله او د فارغېدونکو محصلينو په نمايندهگۍ مولوي ثناء الله راحل هم ويناوې وکړې.
پای کې فارغانو ته د تصدیق پاڼو له وېش وروسته غونډه د شرعياتو پوهنځي استاد مولوي خانزاده پر لنډې وينا او دُعايه کلماتو سره پای ته ورسېده.
